網紅的藏寶箱【#壞了就該淘汰】
為準備自己幾個月後終於終於要搬屋（講咗兩年要搬離屋企，終於要實行啦），呢排一有時間就打開櫃筒執下野，睇下有咩要掉就預早掉，然後發現自己真係一個戀物狂！
我好鍾意儲野，我係嗰種見到個靚嘅紙袋都會唔捨得掉，心裡同自己講「之後可以用嚟裝野，或者送野畀人時用喎」，然後就面帶微笑將呢啲無用之物一一放入櫃，如是者我收起咗好多無用之物：紙袋、包裝盒、貼紙、別人寫嘅字條等。而呢堆野早已經喺我記憶中遺忘，到下次要送禮畀人時，根本都唔會記得櫃筒角落裡有個好靚嘅紙袋。
然後我又發現自己有時好鍾意過分地賦予一樣物件過大嘅意義。人愈大我愈容易覺得一樣物件有價值同意義，例如係別人手寫嘅兩句字條，我會將呢啲字條同明信片放埋一齊，因為覺得有人寫野畀自己非常可貴。又例如我會儲起麥仔送嘅禮物包裝盒，因為我覺得禮物內外都一樣有其意義。就係咁，我總係有辦法為一樣無用嘅東西尋找佢嘅意義，於是每件都留低，keep下keep下就有好多呢類雜物。
今次嘅搬屋我已經下定決心，我會為自己嚟一次深層次斷捨離，將櫃筒角落嘅無用之物一一掉棄。
我成日都覺得執屋係種練習，係一種學習割捨嘅過程，亦係一種重新審視自己「需要」同「想要」之別嘅過程。學習割捨，實在係人生每一階段都非常之需要嘅課題。
不論係房內嘅雜物，或係現實生活中嘅可有可無嘅關係、感情，更甚嘅係自己內在一直捉實唔放嘅執著。有時候我哋會誤會「想要」同「需要」，我哋會放大咗一樣物件/一個人對自己嘅意義同價值，然後死命去捉住，但其實花光氣力最後，我哋終會發現自己執著緊嘅只係一堆雞肋。只不過係因為覺得放棄太可惜，覺得付出過時間、心血、精神、金錢喺呢樣事物身上，就唔願意割捨，死手不放，最後只會耽誤自己更多嘅時間、空間。
房間空間有限，就如自己心裡嘅空缺一樣，如果永遠唔割捨舊物，只會阻礙以後嘅發展。而現實又的而且確係，我哋無辦法捉住每樣物件都死不放手，手只有兩隻，到最後我哋都只能選擇對自己最重要嘅事物。對自己無用、無益嘅人同物，就毋須執著，不如及早清空。
IG：@hkgirlfriend
FB：港女友
Search